Mwynhaodd mwy na 100 o bobl ifanc o bob cwr o Flaenau Gwent haf o hwyl ac ysbryd cymunedol diolch i weithgareddau a gyflwynwyd drwy'r Bartneriaeth Alcohol Cymunedol (CAP) leol.
Darparodd y rhaglen, dan arweiniad Gwasanaeth Ieuenctid Blaenau Gwent a chefnogaeth partneriaid CAP gan gynnwys Heddlu Gwent, Gwasanaeth Tân ac Achub De Cymru a busnesau lleol, ddigwyddiadau diogel a diddorol yn ystod gwyliau'r ysgol, gan roi dewisiadau amgen cadarnhaol i bobl ifanc yn lle gweithgareddau sy'n gysylltiedig ag alcohol ac ymddygiad gwrthgymdeithasol.
Cymerodd cyfanswm o 106 o bobl ifanc ran mewn cyfres o ddigwyddiadau, gan gynnwys Ras Lliw hynod boblogaidd, cerddoriaeth fyw, gweithgareddau chwaraeon a chyfleoedd i gysylltu â gwasanaethau cymorth lleol.
Mae'r fenter yn rhan o waith parhaus CAP yng Nglynebwy a Thredegar, sy'n dod â sefydliadau ynghyd i helpu i leihau yfed dan oed, gwella diogelwch cymunedol a chreu cyfleoedd cadarnhaol i bobl ifanc.
Profodd y digwyddiadau’n arbennig o lwyddiannus wrth ymgysylltu â phobl ifanc a allai fel arall fod mewn perygl o niwed sy’n gysylltiedig ag alcohol. Dangosodd adborth a gasglwyd yn ystod y rhaglen fod rhai cyfranogwyr wedi dewis mynychu’r gweithgareddau yn lle treulio amser yn yfed alcohol, gan ddangos yr effaith gadarnhaol y gall ymyrraeth gynnar a gweithgareddau dargyfeiriol ei chael.
Yn ogystal â chael hwyl, roedd pobl ifanc yn gallu siarad â staff y gwasanaeth ieuenctid a busnesau lleol am gyfleoedd cyflogaeth, hyfforddiant a gwirfoddoli, gan eu helpu i ystyried llwybrau yn y dyfodol wrth feithrin hyder a pherthnasoedd newydd.
Dywedodd y Cynghorydd Sue Edmunds, Aelod Cabinet dros Blant, Pobl Ifanc a Theuluoedd:
"Mae llwyddiant y digwyddiadau haf hyn yn dangos yr hyn y gellir ei gyflawni pan fydd sefydliadau lleol yn gweithio gyda'i gilydd i gefnogi pobl ifanc. Trwy'r Bartneriaeth Alcohol Cymunedol, rydym am greu cyfleoedd sy'n hwyl ac yn gynhwysol, ac sy'n helpu pobl ifanc i wneud dewisiadau cadarnhaol. Mae gweld mwy na 100 o bobl ifanc yn mwynhau eu hunain mewn amgylchedd diogel ac yn ymgysylltu â gwasanaethau lleol yn ganlyniad gwych, ac mae'n amlygu gwir werth gweithio mewn partneriaeth."
"Mae llwyddiant y rhaglen wedi atgyfnerthu pwysigrwydd gwaith y Bartneriaeth Alcohol Cymunedol ym Mlaenau Gwent, gyda phartneriaid yn awyddus i adeiladu ar y momentwm hwn a pharhau i ddarparu gweithgareddau sy'n helpu pobl ifanc i aros yn ddiogel ac yn iach, ac i barhau i fod yn rhan o'u cymunedau."
Dywedodd Kate Winstanley, Cyfarwyddwr Partneriaethau Alcohol Cymunedol:
“Mae’r rhaglen hon yn enghraifft wych o sut mae Partneriaethau Alcohol Cymunedol yn dod â sefydliadau lleol at ei gilydd i wneud gwahaniaeth gwirioneddol. Drwy gydweithio â’r gwasanaeth ieuenctid, y gwasanaethau brys a busnesau lleol, mae’r partneriaid wedi creu cyfleoedd i bobl ifanc gael hwyl, datblygu sgiliau newydd a gwneud cysylltiadau a fydd o fudd iddynt y tu hwnt i wyliau’r haf.”
