Ein Fframwaith Caffael
Mae Cyngor Bwrdeistref Sirol Blaenau Gwent yn gweithredu o fewn strwythur llywodraethu clir i sicrhau bod pob caffael yn gyfreithlon, yn deg ac yn effeithiol.
Mae hyn yn cynnwys:
Polisïau Corfforaethol Eraill
Diogelu Corfforaethol mewn Caffael
Mae Cyngor Bwrdeistref Sirol Blaenau Gwent wedi ymrwymo i sicrhau bod pob oedolyn a phlentyn sy'n dod i gysylltiad â'n gwasanaethau, yn uniongyrchol neu'n anuniongyrchol, yn cael eu diogelu rhag niwed, cam-drin, esgeulustod ac ecsbloetio. Mae diogelu yn gyfrifoldeb pawb, ac mae hyn yn cynnwys y sefydliadau a'r unigolion sy'n cyflenwi nwyddau, gwaith a gwasanaethau ar ein rhan.
Ein Disgwyliadau o Gyflenwyr a Chontractwyr
Disgwylir i bob cyflenwr, contractwr a darparwr gwasanaeth a gomisiynir sy'n gweithio gyda'r Cyngor neu ar ei ran:
- Hyrwyddo diwylliant diogel o fewn eu sefydliad, gan sicrhau bod lles plant ac oedolion sydd mewn perygl yn flaenoriaeth graidd.
- Cael polisïau a gweithdrefnau diogelu priodol ar waith, sy'n gymesur â natur y contract a lefel y cyswllt â'r cyhoedd.
- Sicrhau bod yr holl staff ac isgontractwyr wedi'u hyfforddi i gydnabod, ymateb i ac adrodd am bryderon diogelu.
- Mabwysiadu arferion recriwtio diogel, gan gynnwys gwiriadau cyn-cyflogi perthnasol, gwiriadau cefndir a goruchwyliaeth barhaus staff.
- Adrodd am bryderon diogelu ar unwaith, gan ddilyn llwybrau adrodd y Cyngor neu eu gweithdrefnau mewnol eu hunain, yn ôl yr angen.
- Cydweithredu â'r Cyngor mewn unrhyw ymholiadau, archwiliadau neu wiriadau cydymffurfio ynghylch diogelu.
Diwydrwydd Dyladwy a Rheoli Contractau
Mae gofynion diogelu yn rhan o'n prosesau caffael a rheoli contractau. Gall hyn gynnwys:
- Asesiad o drefniadau diogelu yn ystod y camau cyn-gymhwyso a thendro
- Cyflwyno polisïau diogelu yn orfodol
- Gwiriadau cymesur yn seiliedig ar risg
- Cymalau contract sy'n ymwneud â chyfrifoldebau diogelu
- Monitro parhaus drwy gydol cyfnod y contract
Gall methu â chyflawni rhwymedigaethau diogelu arwain at atal neu derfynu'r contract
Cyflogaeth Foesegol mewn Cadwyni Cyflenwi a Chaethwasiaeth Fodern
Mae Blaenau Gwent yn darparu ystod eang o wasanaethau cyhoeddus statudol a dewisol, a ddarperir yn uniongyrchol trwy ein gweithlu ein hunain, a thrwy sefydliadau cyhoeddus, preifat a thrydydd sector eraill.
Mae'r Cyngor wedi ymrwymo i God Ymarfer Llywodraeth Cymru ar gyfer:
Cyflogaeth Foesegol mewn Cadwyni Cyflenwi
Mae 12 ymrwymiad y Cod yn cynnwys mynd i'r afael â Chaethwasiaeth Fodern a Masnachu Pobl, mae'r datganiad hwn yn nodi'r camau gweithredu y mae'r Cyngor wedi'u cymryd, a bydd yn parhau i'w cymryd, i sicrhau nad oes Caethwasiaeth Fodern na Masnachu Pobl yn ein busnes a'n cadwyni cyflenwi ein hunain.
Mae Cyngor Blaenau Gwent wedi ymrwymo'n llwyr i ddarparu gwelededd i'w ddatganiad Caethwasiaeth Fodern a sicrhau 'Tryloywder yn ein Cadwyni Cyflenwi'. Yn unol â Deddf Caethwasiaeth Fodern 2015, mae'r Cyngor yn cydnabod y cyfrifoldeb sydd ganddo fel cyflogwr i fod yn ymwybodol o'r potensial ar gyfer achosion o Gaethwasiaeth Fodern ac i adrodd am achosion neu bryderon o'r fath i'r cyrff perthnasol.
I'r perwyl hwn mae'r Cyngor yn gweithio mewn partneriaeth â Llywodraeth Cymru, y sector cyhoeddus ehangach, cyflenwyr, darparwyr gwasanaethau, undebau llafur ac eraill i fynd i'r afael â heriau Caethwasiaeth Fodern gyda'r nod o leihau risgiau a nifer yr achosion o gaethwasiaeth fodern a masnachu pobl.
Gwerth Cymdeithasol a Buddion Cymunedol
Mae Cyngor Bwrdeistref Sirol Blaenau Gwent wedi ymrwymo i wneud y mwyaf o'r effeithiau economaidd, cymdeithasol, amgylcheddol a diwylliannol cadarnhaol y gall ein gweithgaredd caffael eu cyflawni ar gyfer cymunedau lleol. Drwy ymgorffori Buddion Cymunedol a Gwerth Cymdeithasol yn ein contractau, rydym yn sicrhau bod gwariant cyhoeddus yn creu gwelliannau ystyrlon a pharhaol i bobl Blaenau Gwent.
Ein Dull o Weithredu
Rydym yn cymhwyso egwyddorion Deddf Llesiant Cenedlaethau'r Dyfodol (Cymru) 2015 a Datganiad Polisi Caffael Cymru, gan sicrhau bod pob contract perthnasol yn cyfrannu at nodau llesiant ehangach megis:
- Cefnogi swyddi lleol a hyfforddiant
- Lleihau anghydraddoldebau a hyrwyddo gwaith teg
- Annog cadwyni cyflenwi lleol a gwydnwch cymunedol
- Gwella cynaliadwyedd amgylcheddol
- Cryfhau cydlyniant a lles cymunedol
Ystyrir Manteision Cymunedol yn ystod cynllunio caffael, gwerthuso tendrau a rheoli contractau i sicrhau bod ymrwymiadau'n realistig, yn gyflawnadwy ac yn gymesur â natur a gwerth pob contract.
Disgwyliadau gan Gyflenwyr
Rydym yn disgwyl i gyflenwyr, contractwyr a darparwyr gwasanaethau weithio gyda ni i nodi cyfleoedd sy'n darparu gwerth ychwanegol i Flaenau Gwent. Mae enghreifftiau'n cynnwys:
- Cyflogaeth a Sgiliau: prentisiaethau, lleoliadau gwaith, recriwtio lleol
- Cymorth i Fusnesau Bach a Chanolig Lleol a Mentrau Cymdeithasol: cyfleoedd cadwyn gyflenwi, meithrin gallu
- Cymorth Cymunedol: gwirfoddoli, mentrau elusennol, cyfraniadau mewn nwyddau
- Camau Gweithredu Amgylcheddol: lleihau carbon, arferion economi gylchol, gwelliannau bioamrywiaeth
- Llesiant a Chynhwysiant: mentrau sy'n hyrwyddo cydraddoldeb, hygyrchedd a chyfranogiad cymunedol
Efallai y gofynnir i gyflenwyr gyflwyno cynigion Buddion Cymunedol fel rhan o'r broses dendro ac i adrodd ar gynnydd drwy gydol tymor y contract.
Mesur a Monitro Effaith
Rydym yn defnyddio trefniadau monitro cymesur i sicrhau bod ymrwymiadau Buddion Cymunedol a Gwerth Cymdeithasol yn cael eu cyflawni'n effeithiol. Gall hyn gynnwys:
- Adrodd yn rheolaidd yn erbyn dangosyddion y cytunwyd arnynt
- Cyfarfodydd cynnydd gyda rheolwyr contract
- Tystiolaeth o ganlyniadau a gyflawnwyd (e.e., swyddi a grëwyd, oriau a wirfoddolwyd)
- Rhannu arfer gorau i gefnogi gwelliant parhaus
Ein nod yw gwneud Buddion Cymunedol yn rhan safonol o ddarparu gwasanaethau cyhoeddus o safon, gan sicrhau tryloywder ac atebolrwydd.
Gweithio Gyda'n Gilydd ar gyfer Blaenau Gwent Cryfach
Drwy bartneru â chyflenwyr sy'n rhannu ein hymrwymiad i werth cymdeithasol, rydym yn helpu i sicrhau bod pob punt sy’n cael ei wario nid yn unig yn darparu gwasanaethau da, ond hefyd fuddion ehangach i'n cymunedau, ein hamgylchedd a'n heconomi leol.
Rydym yn croesawu syniadau arloesol gan gyflenwyr ac yn edrych ymlaen at gydweithio i greu effaith gadarnhaol, barhaol ar draws Blaenau Gwent.
Gwerth Cymdeithasol a Buddion Cymunedol
Datgarboneiddio
Mae Cyngor Bwrdeistref Sirol Blaenau Gwent wedi ymrwymo i chwarae ei ran lawn wrth fynd i'r afael â newid hinsawdd a chefnogi uchelgais genedlaethol Cymru i gyflawni allyriadau carbon Net Sero erbyn 2030. Mae gan caffael rôl hanfodol yn y newid hwn. Drwy gydweithio'n agos â'n cyflenwyr, ein nod yw lleihau allyriadau carbon ar draws ein cadwyni cyflenwi, annog arloesi mwy gwyrdd, a chyflawni contractau sy'n cefnogi dyfodol mwy cynaliadwy i Flaenau Gwent.
Ein Dull o Weithredu
Rydym yn ymgorffori egwyddorion datgarboneiddio yn ein prosesau cynllunio caffael, tendro a rheoli contractau. Mae hyn yn golygu:
- Blaenoriaethu cynhyrchion, gwasanaethau ac atebion carbon isel ac effeithlon o ran ynni
- Ystyried costau oes gyfan ac effeithiau amgylcheddol, nid pris yn unig
- Cefnogi'r economi gylchol trwy ailddefnyddio, atgyweirio a lleihau gwastraff
- Annog cyflenwyr i fesur, rheoli a lleihau eu hôl troed carbon
- Defnyddio caffael i gefnogi ymrwymiadau adfer hinsawdd a natur ehangach y
- Cyngor
Mae'r camau gweithredu hyn yn helpu i sicrhau bod gwariant cyhoeddus yn cyfrannu'n gadarnhaol at ein hamcanion amgylcheddol a chynaliadwyedd hirdymor.
Disgwyliadau gan Gyflenwyr
Rydym yn disgwyl i gyflenwyr, contractwyr a darparwyr a gomisiynir:
- Nodi cyfleoedd i leihau allyriadau carbon sy'n gysylltiedig â'r nwyddau, y gwaith neu'r gwasanaethau a ddarparant
- Mabwysiadu arferion cynaliadwy, fel lleihau gwastraff, lleihau'r defnydd o ynni, a defnyddio cerbydau neu offer allyriadau isel
- Darparu gwybodaeth am effeithiau amgylcheddol, lle bo'n berthnasol, gan gynnwys adrodd ar garbon a manylion cynaliadwyedd
- Cefnogi arloesi, cynnig dewisiadau amgen mwy gwyrdd neu atebion carbon isel
- Dangos cydymffurfiaeth â deddfwriaeth amgylcheddol a safonau'r diwydiant
Gall ystyriaethau amgylcheddol ffurfio rhan o feini prawf gwerthuso tendrau a byddant yn gymesur â natur a graddfa'r contract.
Costio Oes Gyfan a Dewisiadau Cynaliadwy
Wrth werthuso cynigion, rydym yn edrych y tu hwnt i gostau a delir ymlaen llaw ac yn ystyried yr effaith amgylcheddol gyfan ar draws oes gyfan y cynnyrch neu'r gwasanaeth. Mae hyn yn cynnwys:
- Gwydnwch a chynnal a chadw
- Defnydd ynni
- Dewisiadau gwaredu neu ddiwedd oes
- Cyfleoedd i ailddefnyddio neu ailgylchu
- Arbedion carbon tymor hir
Mae'r dull hwn yn helpu i sicrhau gwerth am arian wrth gefnogi gwelliant amgylcheddol.
Monitro a Gwella Parhaus
Gellir monitro ymrwymiadau amgylcheddol sydd wedi'u cynnwys mewn contractau drwy gydol y broses gyflenwi. Gall hyn gynnwys:
- Adrodd yn rheolaidd ar weithgareddau lleihau carbon
- Tystiolaeth o ddewisiadau caffael cynaliadwy
- Diweddariadau ar gynnydd tuag at dargedau amgylcheddol y cytunwyd arnynt
- Trafodaethau ar gyfleoedd i leihau allyriadau ymhellach
Rydym yn annog cyflenwyr i wella'n barhaus ac i gydweithio â ni ar ffyrdd newydd o leihau effaith amgylcheddol.
Gweithio Gyda'n Gilydd dros Flaenau Gwent Gwyrddach
Mae datgarboneiddio yn gyfrifoldeb a rennir. Drwy bartneru â chyflenwyr sy'n cofleidio arferion cynaliadwy, gallwn leihau allyriadau, gwarchod adnoddau naturiol, a helpu i adeiladu Blaenau Gwent glanach, iachach a mwy gwydn.
Rydym yn croesawu syniadau arloesol o'r gadwyn gyflenwi ac yn edrych ymlaen at gydweithio i gefnogi'r newid i Sero Net.
Cynllun Argyfwng Hinsawdd Blaenau Gwent
Nodyn Polisi Caffael Cymru (WPPN) 12/21
Polisi Dim Rhif Archeb Dim Tâl
Gofynnir i chi nodi fod Cyngor Bwrdeistref Sirol Blaenau Gwent yn awr yn gweithredu Polisi Dim Rhif Archeb, Dim Tâl.
Yn y dyfodol, mae’n rhaid i anfonebau a gyflwynir i’r Awdurdod gynnwys rhif Archeb Brynu diliys CBSBG er mwyn cael eu prosesu ar gyfer taliad. Lle nad yw anfonebau yn nodi rhif Archeb Brynu dilys CBSBG, dychwelir anfonebau at y cyflenwr heb eu talu. Gellir cael rhifau Archeb Brynu gan y Swyddog sy’n gwneud cais am y nwyddau neu wasanaethau a gyflenwyd.