Lansiwyd Y Den Mawr yn swyddogol y mis hwn yn dilyn tri mis cyntaf llwyddiannus o fasnachu, gan ddathlu'r hyn y mae'r siop ailddefnyddio eisoes wedi'i gyflawni ar draws Blaenau Gwent.
Yn dilyn effaith gadarnhaol 'Y Den' yn Roseheyworth, mae'r elusen Wastesavers a Chyngor Blaenau Gwent wedi ymuno unwaith eto i ddod â’r ‘Den Mawr' i Lyn Ebwy.
Uchafbwynt y digwyddiad oedd dadorchuddio darn unigryw o waith celf a grëwyd gan grwpiau cymunedol lleol yn gweithio gyda'r artist Stephanie Roberts, trwy brosiect a gefnogwyd gan Celfyddydau BG. Mwynhaodd ymwelwyr hefyd y gwaith celf trawiadol ar y tu allan a grëwyd gan Tee2Sugars, a chawsant gyfle i weld disgyblion Ysgol Gynradd Willowtown yn cymryd rhan mewn gweithgareddau oedd yn archwilio ailddefnyddio, cynaliadwyedd a'r economi gylchol.
Wedi’i lleoli wrth ymyl Canolfan Ailgylchu Nwyddau Cartref Glynebwy, mae Y Den Mawr yn rhoi cyfle i drigolion roi eitemau o safon dda i'w hailddefnyddio. Gellir rhoi ail fywyd i ddodrefn, eitemau cartref, teganau a mwy drwy'r siop.
Yn ogystal â derbyn rhoddion, mae Y Den Mawr yn cynnig nwyddau fforddiadwy sydd wedi'u defnyddio o'r blaen i'r gymuned. Mae unrhyw elw a wneir yn cael ei ail-fuddsoddi yn Wastesavers Charitable Trust, gan helpu i gefnogi amrywiaeth o fentrau cymunedol sydd o fudd i drigolion Blaenau Gwent. Mae hyn yn cynnwys rhaglen wirfoddoli gynhwysfawr, llyfrgell cewynnau y gellir eu hailddefnyddio, a gwersi addysg ynghylch ailgylchu ac ailddefnyddio ar gyfer ysgolion lleol. Rhoddir eitemau hefyd i gefnogi pobl a theuluoedd lleol sydd mewn angen.
Agorodd Y Den Mawr ei drysau ym mis Mehefin ac mae eisoes wedi dargyfeirio dros 23 tunnell o eitemau y gellir eu hailddefnyddio oddi wrth y ffrwd wastraff. I nodi'r dechrau cryf hwn, daeth y lansiad swyddogol â chynrychiolwyr y Cyngor, grwpiau cymunedol a disgyblion o Ysgol Gynradd Willowtown ynghyd i ddathlu llwyddiant y siop a'r partneriaethau sydd wedi helpu i'w gwneud yn bosibl.
Dywedodd Penny Goodwin, Prif Swyddog Gweithredol Wastesavers:
"Er bod Y Den Mawr wedi bod yn croesawu cwsmeriaid ers mis Mehefin, roeddem am fanteisio ar y cyfle i lansio'r siop yn swyddogol a dathlu popeth sydd wedi'i gyflawni hyd yma.
Mae dargyfeirio 23 tunnell o eitemau mewn ychydig fisoedd yn unig yn gamp wych, ond rydym yr un mor falch o'r gymuned sy'n tyfu o amgylch y siop.
Hoffem ddiolch i Gyngor Blaenau Gwent, Celfyddydau BG, ein gwirfoddolwyr, ein cwsmeriaid a'n cefnogwyr am helpu i wneud Y Den Mawr yn gymaint o lwyddiant. Rydym yn annog unrhyw un nad yw wedi ymweld eto i ddod i weld beth sydd gennym i'w gynnig, p'un a ydych chi'n chwilio am fargen neu â nwyddau yr hoffech eu rhoi."
Dywedodd y Cynghorydd Morgan, Hyrwyddwr Hinsawdd Cyngor Blaenau Gwent:
“Mae 'Y Den Mawr' yn brosiect partneriaeth gwych sy'n dangos ein hymrwymiad parhaus i leihau gwastraff, hyrwyddo ailddefnyddio a diogelu ein hamgylchedd. Drwy roi ail fywyd i eitemau diangen, mae'r siop yn helpu i gefnogi trigolion lleol, lleihau gwastraff ac annog ffyrdd mwy cynaliadwy o fyw.
Hoffwn ddiolch i bawb a fu’n rhan o wireddu’r prosiect hwn ac annog trigolion i gefnogi’r siop drwy roi eitemau a siopa yno, gan ein helpu i greu Blaenau Gwent gwyrddach gyda’n gilydd. Diolch hefyd i Lywodraeth Cymru, a’n helpodd i wireddu’r prosiect hwn ac a ddarparodd gyllid i’w wneud yn bosibl.”
Mae Y Den Mawr yn annog trigolion i ymweld â’r siop, darganfod eitemau fforddiadwy sydd wedi’u defnyddio o’r blaen, a rhoi nwyddau o safon nad oes eu hangen arnynt mwyach cyn mynd i’r Ganolfan Ailgylchu Nwyddau Cartref. Boed yn ddarn o ddodrefn, bocs o lyfrau neu eitem cartref nad oes ei hangen mwyach, gall rhoi’r eitem i’w hailddefnyddio helpu rhywun arall tra’n atal yr eitem rhag mynd i’r ffrwd wastraff.
Ynglŷn â’r Den Mawr
Mae Y Den Mawr yn siop ailddefnyddio gymunedol sy'n cael ei rhedeg gan Wastesavers Charitable Trust mewn partneriaeth â Chyngor Blaenau Gwent. Wedi'i lleoli wrth ymyl y Ganolfan Ailgylchu Nwyddau Cartref yng Nglynebwy, mae'r siop yn cynnig dodrefn, eitemau cartref a nwyddau eraill y gellir eu hailddefnyddio am brisiau fforddiadwy. Gall preswylwyr hefyd roi eitemau diangen sydd mewn cyflwr da, gan helpu i ddod o hyd i gartref newydd iddynt yn hytrach na mynd yn wastraff. Gan adeiladu ar lwyddiant Siop Ailddefnyddio Roseheyworth, mae Y Den Mawr yn ei gwneud hi'n haws i bobl ar draws Blaenau Gwent ailddefnyddio, rhoi a siopa mewn ffordd gynaliadwy.
