Mae Ysgol Gynradd Coed-y-Garn, Blaenau, yn falch o fod wedi dod yr ysgol gyntaf yng Ngwent, ac yng Nghymru, fe gredwn, i addasu, cyflwyno a chwblhau Rhaglen Anrhydeddau Ysgolion Cynradd y DU, gyda chefnogaeth y Brigadwr Robert Aitken CBE, Arglwydd Raglaw Gwent EF. Mae'r fenter arloesol hon yn nodi carreg filltir arwyddocaol mewn cyfoethogi addysgol ac ymgysylltiad dinesig i ddysgwyr ifanc yn y rhanbarth.
Yn ystod y rhaglen, archwiliodd y disgyblion hanes ac arwyddocâd y System Anrhydeddau, gan ddysgu beth yw Anrhydedd, pam mae unigolion yn cael eu cydnabod, a'r gwahanol fathau o Anrhydeddau a ddyfernir yn y Deyrnas Unedig. Ymchwiliodd y plant hefyd i dderbynwyr nodedig o Gymru a anrhydeddwyd gan EM y Frenhines Elizabeth II ac EF y Brenin Siarl III.
Agwedd unigryw ar y rhaglen oedd annog disgyblion i fyfyrio ar eu dyheadau eu hunain ac ystyried y cyfraniadau eithriadol y gallent eu gwneud yn y dyfodol - cyfraniadau sy'n deilwng o enwebiad Anrhydedd. Dyluniodd pob plentyn Fedal Anrhydedd bersonol, yn gysylltiedig â'u cyflawniadau disgwyliedig, a daethant â'u dyluniadau'n fyw gan ddefnyddio argraffydd 3D yr ysgol.
Uchafbwynt y rhaglen oedd seremoni arwisgo ysbrydoledig, lle cyflwynodd plant Dosbarth Aur eu dysgu i aelodau'r teulu a chymuned ehangach yr ysgol. Mynychodd y Brigadwr Robert Aitken CBE, Arglwydd Raglaw Gwent EF fel y gwestai uchel ei barch a chyflwynodd y gwobrau i'r disgyblion hynny a gwblhaodd bob un o bedwar modiwl Rhaglen Anrhydeddau Ysgolion. Roedd y seremoni yn cynnwys delweddau a gynhyrchwyd gan AI o ddyfodol y plant, gan ychwanegu dimensiwn creadigol a blaengar i'r digwyddiad.
Diolchwyd yn arbennig i bawb a fynychodd, gan gynnwys rhieni, gofalwyr, aelodau o'r teulu, y Parchedig Roy Watson BEM (Cadeirydd y Llywodraethwyr), Mrs Susan Gwyer-Roberts, y Dirprwy Raglaw sy'n arwain y fenter hon ar gyfer y Raglawiaeth yng Ngwent, a staff a disgyblion ymroddedig Coed-y-Garn.
Gwnaeth y Cynghorydd Sue Edmunds y sylw canlynol: “Mae'n wych gweld Rhaglen Anrhydeddau Ysgolion Cynradd y DU ar waith. Mae ein System Anrhydeddau yn enghraifft wych o Werthoedd Prydeinig, pwnc sy'n cyd-fynd â’r cwricwlwm ar gyfer ysgolion cynradd ac uwchradd. Drwy fabwysiadu'r rhaglen hon mae Ysgol Gynradd Coed-y-Garn wedi ysbrydoli ein pobl ifanc i ystyried ffyrdd y gallant wneud gwahaniaeth i'n cymunedau yn y dyfodol.”
Wrth fyfyrio ar y rhaglen, dywedodd Mrs Holder, athrawes Dosbarth Aur:
“Roedd y Rhaglen Anrhydeddau yn gyfle dysgu pleserus a diddorol. Roedd yn hyfryd darganfod dyheadau'r plant ar gyfer y dyfodol. Roeddwn i'n falch ohonyn nhw i gyd - maen nhw wedi bod yn archarwyr i mi.”
Llongyfarchiadau i Dosbarth Aur – edrychwn ymlaen i’ch gweld chi’n cyflawni popeth rydych chi’n gobeithio ei gyflawni!
Os hoffai unrhyw ysgol yng Ngwent gael mwy o wybodaeth, cysylltwch â Mrs L Cairns, Pennaeth @CyG neu Mrs Gwyer-Roberts drwy wefan y raglawiaeth LLGwent@monmouthshire.gov.uk