Trosolwg
Mae Cyngor Bwrdeistref Sirol Blaenau Gwent yn adolygu capasiti ei ysgolion yn flynyddol. Felly mae’r Cyngor yn ymateb i’r cynnydd mewn galw a thwf a nodwyd dros y 3 blynedd ddiwethaf, yn unol â cheisiadau am leoli disgyblion ar gyfer Ysgol Arbennig Pen y Cwm. Mae Ysgol Arbennig Pen y Cwm yn darparu ar gyfer disgyblion (rhwng 3-19 oed) gyda sbectrwm eang o anghenion addysgol a meddygol arbennig cymhleth, yn cynnwys anawsterau dysgu dwys a lluosog. Mae’r ysgol yn darparu ar gyfer disgyblion Blaenau Gwent, ynghyd â disgyblion o’r tu allan i’r sir ar hyn o bryd.
Cenhadaeth yr ysgol yw: “Grymuso a chefnogi unigolion i fod yn gryf ac yn annibynnol ac i ddatblygu sgiliau i gyrraedd eu potensial”.
Y Cynnig
Mae’r ymgynghoriad hwn yn adeiladu ar yr ymgynghoriad a gynhaliwyd yn 2021 i gynyddu capasiti Ysgol Arbennig Pen y Cwm o 175 i 205 o ddysgwyr yn 2026, sy’n fwy na 10% o gyfanswm capasiti’r ysgol. Mae hefyd yn datblygu elfennau o Ran 2 o gynnig 2021. Mae Cyngor Bwrdeistref Sirol Blaenau Gwent yn cynnig ymestyn y capasiti yn Ysgol Arbennig Pen y Cwm o 205 i 250 o leoedd yn y tymor hir, fel y manylir yn Rhan 2 isod. Er mwyn hwyluso’r capasiti estynedig, ailwampiwyd yr amgylchedd dysgu presennol gan y cyngor i greu lleoedd ystafell ddosbarth ychwanegol a chyfleusterau cysylltiedig, h.y. toiledau. Yn ogystal, ac ochr yn ochr â hyn, nododd y cyngor y byddai angen symud y ddarpariaeth ôl-16 o’i lleoliad presennol ar y safle a’i rhoi yn Vision House, Glynebwy, sy’n creu darpariaeth fwy cynaliadwy lai na hanner milltir o’r adeilad presennol. Mae’r cyngor wedi ymrwymo i barhau i weithio gyda’r ysgol i ddatblygu cynllun hirdymor i gefnogi twf a datblygu cynaliadwy. Felly, bydd y cynnig hwn yn cael ei gyflwyno mewn dwy ran:
- Rhan 1: Cynyddu capasiti Ysgol Arbennig Pen y Cwm o 175 i 205 o leoedd i baratoi ar gyfer blwyddyn academaidd 2026/27. Bydd hyn hefyd yn cynnwys:
o Cydnabod yn ôl-weithredol y ddarpariaeth ôl-16 yn Uned 4, Safle’r Ŵyl, Glynebwy (gan gynnwys tair ystafell ddosbarth, ystafell synhwyraidd, ystafell gyffredin, ystafell sgiliau bywyd, ystafell gyfarfod, ardal arlwyo/fwyta, toiledau a chyfleusterau hylendid)
o Cydnabyddiaeth ôl-weithredol o ystafelloedd dosbarth ychwanegol a ddatblygwyd ym mhrif adeilad yr ysgol
- Rhan 2: Cynyddu capasiti Ysgol Arbennig Pen y Cwm ymhellach o 205 i 250 o leoedd i baratoi ar gyfer blwyddyn academaidd 2030/31. Bydd hyn yn cynnwys parhau â datblygiad y cynllun hirdymor i sicrhau capasiti ychwanegol, gan gynnwys naill ai darpariaeth adeilad newydd ar y tir gerllaw’r ysgol neu ailwampio adeilad presennol yr ysgol i ddarparu ar gyfer y capasiti cynyddol.
Byddai’r cynnig yn cefnogi gweledigaeth Blaenau Gwent ar gyfer addysg, sydd fel a ganlyn:
Grymuso ein cymunedau i fod yn ddysgwyr gydol oes sy’n uchelgeisiol, egwyddorol a gwybodus ac sy’n byw bywydau llawn ac iach.
Ymgynghoriad
Bydd yr ymgynghoriad hwn yn rhoi cyfle i ymgyngoreion ddysgu mwy am gynnig y cyngor a’i ddeall a mynegi eu barn arno, a fydd yn llywio’r penderfyniad terfynol ar sut i symud ymlaen â’r cynnig.
Bydd y cyfnod ymgynghori ar gyfer y cynnig hwn yn dechrau ddydd Llun, 8 Rhagfyr 2025, gan ddod i ben ddydd Sul, 18 Ionawr 2026.
Gall ymgyngoreion gyflwyno eu sylwadau ar y cynnig, ond dylid nodi na chaiff ymatebion a dderbynnir yn ystod y cyfnod hwn eu nodi fel gwrthwynebiadau i’r cynnig. Dim ond ar ôl cyhoeddi’r hysbysiad y gellir cofrestru gwrthwynebiadau.
Mae’r Tîm Adnoddau a Chynllunio Addysg wedi cynllunio cyfarfodydd rhithwir gyda’r undebau llafur a sesiwn galw heibio isod ar gyfer pob corff llywodraethu’r ysgolion yr effeithir arnynt, staff, rhieni disgyblion a’r gymuned ehangach drwy gydol y cyfnod ymgynghori.
Dydd Mercher 10 Rhagfyr 2025 3:00pm – 6.30pm
Canolfan Dysgu Gweithredol Glynebwy, Stryd James, Glynebwy, NP23 6JG
Hoffai’r Cyngor i chi ystyried yr wybodaeth a nodir yn y llyfryn ymgynghori a rhoi eich sylwadau ar y cynigion.
Os oes gennych unrhyw gwestiynau neu ymholiadau ar yr wybodaeth a gynhwysir yn y ddogfen, cysylltwch â ni os gwelwch yn dda naill ai drwy ddefnyddio cyfeiriad e-bost 21stcenturyschools@blaenau-gwent.gov.uk, neu drwy ein ffonio ar (01495) 355116.
Canlyniad yr Ymgynghorid a’r Camau Nesaf
Adroddiad yr ymgynghoriad
Caiff adborth o’r ymgynghoriad ei gasglu, ei ddadansoddi a’i gyflwyno mewn adroddiad all-dro ar yr ymgynghoriad i gabinet y cyngor ar 23 Chwefror 2026. Bydd yr adroddiad ar gael ar wefan y cyngor bythefnos cyn y gwneir penderfyniad i symud ymlaen neu beidio symud ymlaen i hysbysiad statudol. Gellir gwneud cais am gopi caled drwy’r cyfeiriadau e-bost a nodir uchod. Gall ymgyngoreion hefyd gofrestru eu dymuniad i gael eu hysbysu am gyhoeddiad adroddiad yr ymgynghoriad drwy’r cyfeiriad e-bost uchod.
Hysbysiad Statudol
Os caiff y cynnig hwn ei gymeradwyo gan y cabinet, bydd y cyngor wedyn yn cyhoeddi hysbysiad statudol. Bydd cyfnod yr hysbysiad statudol yn rhedeg am 28 diwrnod rhwng dydd Mercher, 25 Chwefror 2026, a dydd Mercher, 25 Mawrth 2026. Yn ystod y cyfnod hwn, bydd modd i chi wneud gwrthwynebiadau ffurfiol, pe dymunech wneud hynny, drwy’r cyfeiriad e-bost a roddir yn y llyfryn ymgynghori hwn. Caiff unrhyw faterion a godir gan rai sydd â diddordeb wedyn eu crynhoi a’u cyflwyno i’r cabinet er mwyn gwneud penderfyniad terfynol ym mis Ebrill 2026. Os bydd y cynnig yn mynd rhagddo, caiff copi o’r hysbysiad statudol ei arddangos ar wefan y cyngor ac yn Ysgol Arbennig Pen y Cwm. Bydd copïau caled o’r hysbysiad statudol ar gael ar gais.
Penderfyniad ar y cynnig
Bydd Cyngor Bwrdeistref Sirol Blaenau Gwent yn penderfynu ar y cynnig yn seiliedig ar yr ymatebion a geir i’r hysbysiad statudol. Gall hyn arwain at gymeradwyo’r cynnig, ei wrthod, neu ei gymeradwyo gydag addasiadau.
Hysbysiad o’r penderfyniad
Unwaith y gwnaed penderfyniad, anfonir copi electronig ohono at bawb sydd â diddordeb a chaiff ei gyhoeddi ar wefan Cyngor Bwrdeistref Sirol Blaenau Gwent o fewn saith diwrnod o’r penderfyniad.
Pob Ymholiad
Os oes gennych unrhyw gwestiynau neu ymholiadau, gallwch gysylltu â ni naill ai drwy ddefnyddio’r cyfeiriad e-bost islaw neu drwy ein ffonio ar (01495) 355116.
E-Bost: 21stcenturyschools@blaenau-gwent.gov.uk
Mae croeso i chi hefyd lenwi’r arolwg ar-lein yn defnyddio’r ddolen
https://online1.snapsurveys.com/dxns7v
Dylid dychwelyd pob ymateb i’r ymgynghoriad erbyn 5pm ddydd Sul, 18 Ionawr 2026, fan bellaf.