Rydym yn Gyngor Marmot – Rhoi Tegwch a Llesiant yn Gyntaf
Mae Cynghorau Torfaen a Blaenau Gwent yn falch o fod y ddau Gyngor Marmot cyntaf yng Nghymru.
Rydym am gael dyfodol heb anghydraddoldeb, lle mae pawb yn ffynnu mewn cymuned deg, gynhwysol a gwydn.
Rydym wedi ymrwymo i uchelgais feiddgar a phwysig: lleihau anghydraddoldebau iechyd a gwella bywydau pawb yn ein cymunedau – ni waeth ble maen nhw'n byw, beth maen nhw'n ei ennill, neu o ba gefndir maen nhw'n dod.
Beth yw Cyngor Marmot?
Daw'r term o waith yr Athro Syr Michael Marmot, arbenigwr blaenllaw ar anghydraddoldeb iechyd. Mae ei ymchwil yn dangos bod yr amodau y mae pobl yn cael eu geni, yn tyfu, yn byw, yn gweithio ac yn heneiddio ynddynt – fel tai, addysg, incwm a swyddi – yn cael effaith enfawr ar eu hiechyd a'u llesiant.
Rydym yn rhoi'r meddwl hwn ar waith drwy:
- Mynd i'r afael ag achosion sylfaenol iechyd gwael, nid dim ond y symptomau
- Gwneud tegwch yn rhan greiddiol o sut mae penderfyniadau'n cael eu gwneud
- Gweithio gyda phartneriaid, ar draws gwasanaethau a chyda phobl leol i greu cyfleoedd gwell i bawb
- Adeiladu dyfodol iachach a mwy cyfartal i'r genhedlaeth nesaf
Pam Mae Hyn yn Bwysig
Ar hyn o bryd, mae pobl mewn rhai rhannau o'n cymunedau yn byw bywydau llawer byrrach a llai iach nag eraill - yn aml dim ond ychydig filltiroedd ar wahân. Credwn nad yw hyn yn anochel. Mae'n annheg, ac mae'n rhywbeth y gallwn ei newid.
Felly rydym yn defnyddio'r dystiolaeth ddiweddaraf ac yn gweithio i lunio polisïau a gwasanaethau a all wneud y canlynol yn fwy effeithiol:
- Rhoi'r dechrau gorau mewn bywyd i bob plentyn
- Galluogi pob plentyn, person ifanc ac oedolyn i wneud y gorau o'u galluoedd a chael rheolaeth dros eu bywydau
- Creu cyflogaeth deg a gwaith da i bawb
- Sicrhau safon byw iach i bawb
- Creu a datblygu lleoedd a chymunedau cynaliadwy iach
- Cryfhau rôl ac effaith atal afiechyd
- Mynd i'r afael â hiliaeth a gwahaniaethu a'u canlyniadau
- Dilyn cynaliadwyedd amgylcheddol a chydraddoldeb iechyd gyda'n gilydd
Cymru: Cenedl Marmot Gyntaf
Cyhoeddodd Llywodraeth Cymru yn ddiweddar mai Cymru yw Cenedl Marmot gyntaf y byd – carreg filltir arwyddocaol. Mae Torfaen a Blaenau Gwent wedi bod ar flaen y gad yn y daith hon, gan arwain y ffordd a dangos beth sy'n bosibl pan ddaw tegwch yn flaenoriaeth.
Beth Sy'n Digwydd Nesaf?
Nid prosiect untro yw dod yn Gyngor Marmot – mae'n ymrwymiad hirdymor. Byddwn yn parhau i weithio gyda phartneriaid, gwrando ar ein cymunedau, a chymryd camau beiddgar i wneud bywyd yn decach ac yn iachach i bawb.
Gyda'n gilydd, rydym yn adeiladu dyfodol lle nad yw lle rydych chi'n byw yn pennu pa mor dda neu am ba hyd rydych chi'n byw.